Ghazal راج کنور تو راج کرے گا

غزل

راج کنور تو راج کرے گا وہ تو راج دلارا ہے

راج کا بیٹا اینٹ لگائے وہ قسمت کا مارا ہے

چاہے اپنے حق میں تم کئی لاکھ دلیلیں لے آوٗ

جس کے ہاتھ میں لاٹھی ہو گی اس کا چاند ستارہ ہے

آج میری اوقات نہیں ہے کل بھی کوئی خاص نہ تھی

پھر بھی اک نسبت کے ناتے دل کو ایک سہارا ہے

گھر کو چھوڑنے والے کو پھر بستی نے اپنایا نا

چاہے اس نے سود ملا کے دونا قرض اتارا ہے

اپنے آپ سے سچا رہنا میں نے تم سے سیکھا ہے

جھوٹ نگر میں میرے بچو یہ احسان تمہارا ہے

مستقبل کو گروی رکھ کے ماضی کو چمکا لینا

میں اس کو جیسے بھی دیکھوں اس میں صاف خسارہ ہے

گھر میں کوئی رہتا ہو تو لوگ بھی ملنے آتے ہیں

کل جس آنگن سورج اترے آج وہیں اندھیارا ہے

ایک ہی کیفیت میں ہوں میں محفل ہو یا تنہائی

جو بھی وقت گزارا ہے وہ تیرے ساتھ گزارہ ہے

ناصر گوندل

حلقہٗ اربابِ ذوق، نیو یارک

اتوار12/جنوری2020