لال خان کی یاد میں

لال خان کی یاد میں

کمال کے تھے وہ لوگ

جو اس مجاہدے کے نقیب ٹھہرے

عَلم اٹھا کے جو چل پڑے تھے

اندھیر نگری میں روشنی کا سراغ پانے

وہ اس عقیدے میں متحّدتھے

کہ دن چڑھے گا

نہیں تو خود ہی چراغ بن کر 

وہ صبحِ کاذب بپا کریں گے

کئی تو ان میں

غبارِراہ کی مثال بن کر

سحر سے پہلے ہی چھٹ گئے تھے

وہ اس سے پہلے کے کوئی ان کا شمار کرتا 

بکھر گئے تھے

کئی تھے ان میں علم اٹھائے

بغل میں خورشید کو  دبائے

شبِ سیاہ کو مٹا گئے تھے

وہ رات کو دن دکھا گئے تھے

وہ دن چھڑہاتومگر ہوا یہ

  وہ دن بہت ہی خفیف ٹھہرا

اک ایسی آندھی چلی کہ سورج 

مقابلے میں نحیف ٹھہرا

رہا وہ دن تو

مگراندھیرے کے استعارے

میں رات سے بھی ضعیف ٹھہرا

اسے سویرا  قرار  دے کر

بغل میں حساب کے جو چراغ تھے

ان کو ہاتھ لے کر

کئی تھے جو اپنے گھر سدھارے

مگر تھے چند ایک

جانتے تھے

کہ رات اتنی سہل نہیں ہے

یہ روشنی کے جو عکس دکھتے ہیں

دن نہیں ہیں

یہ داشتہایںہیں تاجروں کی

جو بیچتے ہیں

ہزار رنگوں بھرا اندھیرا

وہی تھے چند ایک جو نہ مانے

وہ رات کو رات کہہ سکے تھے

اڑے رہے کہ یہ دن نہیں ہے

اگرچہ لگتا ہے روشنی ہے

مگر سویرا ہوا نہیں ہے

سیاہ جب تک نہ سرخ ہو گا

افق پہ سورج نہیں چڑھے گا

اے رات کو رات کہنے والے

حدیثِ اثبات کہنے والے

ضیا کے ظلمت کدے میں رہ کے

ہمیشہ حق بات کہنے والے

تو اے کہ  تنویر ہائے یثرب

جو لال رستے پہ چل پڑا تھا

لگا کے سب کچھ چلا گیا ہے

کہ اس کی دھرتی کی سرحدوں تک

افق کے اس پار بسنے والے

ہلالِ احمر دکھانے والے

پیمبروں کا پیام پہنجے

تجھے ہمارا سلام پہنچے

تجھے ہمارا سلام پہنچے

ناصر گوندل

نیو یارک

جمعہ6/مارچ2020