Kitabeen Jalana

کتابیں جلانا

ہر اک لکھنے والا

کتابوں کو اپنی یونہی دیکھتا ہے

کہ جیسے وہ ماں ہے

کتابوں کے منہ میں 

اسی کی زباں ہے

انہیں نہ جلاؤ

یہ تخلیق کاروں کو ہوںمارتی ہیں

کہ جیسے کسی کی نگاہوں سے آگے

اسی کا گھروندا گرایا گیا ہو

کتابیں جلانا مناسب نہیں ہےٍ

مگر میری تاریخ

ایسے حوالوں سے ایسے بھری ہے

چھپانا بھی چاہوں

چھپا نہ سکوں گا

وہ ہو قرطبہ کا حکیمِ معلم

یا پھر آج کا باغیانہ لکھاری

لکھا اس نے اپنی نظر سے جو دیکھا

زمانے کےپیمان کو جو نہ سمجھا

اسی کی کتابیں جلائی گئی ہیں

ہمیں جو بتایا گیا ہے وہ سچ ہو

کئی اور باتیں چھپائی گئی  ہیں

کئی داستانیں بتائی گئی ہیں

کئی لوریاں ہیں جو گائی گئی ہیں

خیالاتِ فاسد کی کیا بات کرنا

مقدس کتابیں جلائی گئی ہیں

جہاں بھی کتابوں کو لکھا گیا ہے

وہاں پر کتابیں جلائی گئی ہیں

نہیں متفق ہو جو لکھا گیا ہے

جواباً فقط ایک ہی راستہ ہے

اسے نہ جلاؤ

مقابل میں اس کے نئے حرف لاؤ

کتابیں جلانے سے جلتی نہیں ہیں

وہ خاکستری سے نہیں خاک ہوتیں

جِلا ان کو ملتی ہے جب بھی جلاؤ

انہیںمشتہر کر رہا ہے الاؤ

ناصر گوندل

حلقہٗ اربابِ ذوق، نیو یارک

اتوار28/جون2020؁ء