خواب /Khawab

 خواب

خواب دیکھنے  پر تو کوئ پابندی نہیں

خواب سنانے پر ہے

کیونکہ ایسا کرنے سے آپ

دوسروں کو بھی وہ خواب دکھا دیتے ہیں

جو انہوں نے ابھی تک خود نہیں دیکھا

اس طرح مجاز کو حقیقت میں بدلا جا سکتا ہے

مجاز کو تو جواز کی ضرورت ہوتی ہے

اور حقیقت حق ہے

ایک انسان کا خواب تو مجاز ہے

سب دیکھ لیں تو حقیقت میں بدل سکتا ہے

اس ابلاغ کی اجازت نہیں دی جا سکتی

سرکاری اہلکار نے یہ سب 

ایک سپاٹ لہجے میں کہا

 

اور ہاں

خوابوں کی تعبیر ڈھونڈنے پر بھی پابندی ہے

تعبیر عدم استحکام کی علامت ہے 

جسے کوئ معاشرہ برداشت نہیں کر سکتا

اور ہمارا معاشرہ  تو اب جا کر

صحیح رستے پر لگا ہے

سو بے بنیاد خوابوں کی تعبیریں ڈھونڈنا 

جرم ٹھہرا تو ہے ہی

دوسروں کو سنانا بھی

فساد  فی الارض سے خالی نہیں

آینٰدہ ایسا جواز نہ فراہم کرنے

کی تلقین کے ساتھ

سرکاری اہلکار واپس چلا گیا

آج وہ اہلکار پھر آیا تھا

موجودہ حالات کا تقاضہ ہے کہ

خواب دیکھنا امنِ عامہ کے لیے مضر ہے

آپ یہ روشن دان اور کھڑکیاں بند کر دیں

خواہ مخواہ باہر کی ہوا اور روشنی آتی ہے

اور اس کے ساتھ 

 بھٹکتے ہوئے خواب

بھی آ  ٹپکتے ہیں

نت نئے مسئلے پیدا کر دیتے ہیں

اس میں نیند کا خلل بھی شامل ہے

نیند اچھی آنی چاہیے

سب کا بھلا ہوتا ہے جب لوگ

چین کی نیند سوتے ہیں

ہمارے پاس جدید آلات موجود ہیں

جو ہوا کو گردش میں رکھیں گے

اور مصنوعی روشنی بھی پیدا کریں گے

جب یہ سب کچھ موجود ہے تو

پھر خواب دیکھنے کی کیا ٖضرورت ہے

خواب دیکھیں گے تو سنایں گے بھی

اور ان کی تعبیر بھی ڈھونڈیں گے

سرکاری اہلکار نظریں ملائے  بغیر

رخصت ہو گیا

خواب دیکھنے کے خوف سے

شاید آج رات

مجھے نیند نہ آئے

ناصر گوندل

اتوار ۲۲ نومبر ۲۰۲۰؁ء

نیو یارک