ہمیں اب دور رہنا ہے/CORONA

ہمیں اب دور رہنا ہے

ہوا ہے فیصلہ اب یہ

ہمیں کچھ دور رہنا ہے

ہے لازم

 ہم قدِ آدم برابر

فاصلہ رکھیں

ہمارا پاس آنا

ساتھ رہنا

نقصِ عامہ کے مساوی ہے

ہمیں اک دوسرے سے فاصلہ

رکھنا تو ہے لیکن

ہمیں کچھ اور بھی کرنا ضروری ہے

ہمارے ہاتھ میلے ہیں

ہم اپنے آپ کو بھی چھو نہیں سکتے

ہمیں چہرے بچانے ہیں

سمندر پار سے اٹھا ہے اک

طوفانِ کورونا

جو سانسوں میں سفر کرتا ہوا

تمیزِ نسل و رنگِ آدمیت سے مبرا

ہے دنیا کے ہر اک کونے میں پہنچا

کوئی ہے در کہ نہ ہو جس پہ 

اس آشوب کی دستک؟

کسی بارود یا بندوق سے

مارا نہیں جاتا

بچاوٗ کے لیے گولی نہیں ہے

 یہ وہ جن جو کسی بوتل 

میں ڈالا جا نہیں سکتا

کسی بھی خوردبیں سے یہ

دکھائی دے نہیں سکتا

بہت ہی مختصر ہے

اگرچہ انتہائی ہے مضر

مجھے اب بھی یقیں ہے

وبا یہ حادثاتاً ہم پہ اتری ہے

مکافاتِ عمل کا سلسلہ یا

کسی سازش کا یہ حصہ نہیں ہے

کوئی اس میں خدائی

کارفرمائی نہیں ہے

مگر پھر بھی گماں ہے

یہ سب کچھ اتفاقاً ہو بھی سکتا ہے

مگر لگتا نہیں ہے

کوئی ہم کو بتانا چاہتا ہے

فضاوٗں میں بہت آلودگی ہے

قرابت میں بہت پیچیدگی ہے

بہت جلدی ہے ہم کو

اور ہم

 تدبیر کے جذبے سے عاری ہیں

ہواٗوں میںزہر جب تیرتا ہو

کہ دست و کف بھی 

میلے ہو گئے ہوں

وبائیں پھیلتی ہیں

وبا جب پھیلتی ہے تو

اکٹھا ہو کے رہنے سے

وہاں برکت نہیں بڑھتی

حریفِ جاں پنپتی ہے

ابھی تو یہ عذابِ عارضی ہے

یہ ٹل جائے گا 

یک اک روزِ فردا

مگر جب اس کی اگلی قسط آئے گی

تو ہم تیار ہوں گے؟

یا 

نجاتِ قہر کے موقعے سے

ہم پھر ہاتھ دھو لیں گے

ہمیں فی الحال

 کچھ اقدام کرنے ہیں

ہمیں ہاتھوں کو دھونا ہے

ہمیں کچھ دور رہنا ہے

فقط اب ایک ہی رستہ ہے باقی

فضائے باہمی میں 

سانس لینا 

نہایت ہی مضر ہے

ناصر گوندل

حلقہِ اربابِ ذوق نیو یارک

پہلا آن لائن اجلاس

اتوار مارچ ۲۹، ۲۰۲۰ء؁