https://youtu.be/OtbzExFlovc
https://youtu.be/OtbzExFlovc
دس بارہ دن تے لنگنڑیں نیں
منہ چُک کے ٹُر پیندے ساں
جس پاسے دل کردا سی
شام جے پیندی ستویں تھاں تے
اٹھویں تے دن چڑدا سی
اینج بریکاں لگیاں نے کے
ہونڑ سمجھ وچ آیا اے
اونج تے پلے پیندا نئیں سی
ویرس نے سمجھایا اے
اِکو چھت دے تھلے ریندیاں
دو دو گز ورتنڑیں نیں
جھپی پا کے ملنے تے
دس بارہ دن تے لنگنڑیں نیں
چھیتی چھیتی نسی پجھی
گُنجیاں گنڈاں کھُلدیاں نئیں
ڈاڈا جد تک توا نہ پخے
کچیاں پھلکیاں پھلدیاں نئیں
جس نال سوچ وکھیڑا پے جائے
اوس نوں گل سمجھاون وچ
جس نوں وریاں ہو جان رُسیاں
اوس نوں فیر مناون وچ
اک دو دن وچ مڈھ نئیں بجنڑیں
ناں ای سوتر سُکنڑیں نئیں
وٹ نوں پدریاں ہونڑ وچ
دس بارہ دن تے لنگنڑیں نیں
ایڈے کاہلے پے گئے آں کہ
یاد ناں ریا کہ رُکناں اے
ٹھوکا ٹھاکی کردے پُہل گئے
اک دن اساں وی ٹھُکناں اے
قدرت دی اے منشا اے کے
کھلم کھلا دھوکا اے
جو جی آئے او ای کہہ لو
جو وی کہینڑاں سوکھا اے
اپنے آپ تے آئی تک کے
ات تے تھم کھڑکنڑیں نیں
ڈگدے نوں اُٹھ بیٹھنڑ وچ
دس بارہ دن تے لنگنڑیں نیں
تیرے پِچھے ٹردے ٹردے
ساری عمر گنوا بیٹھے
جو کچھ سانبھ کے رکھیا سی او
ساری پونجی لا بیٹھے
سدھا راہ جو سمجھی پہے او
گھمنڑ گھیر پلیکھا سی
جس دے ہتھ ترکڑی دتی
دوجے ہتھ وچ ٹوکا سی
پُٹھا پھر گیا ہل دا پھالا
بیجے بی وی رلنڑیں نیں
گیڑ نوں سدھیاں کرنڑیں وچ
دس بارہ دن تے لنگنڑیں نیں
ناصر گوندل
نیو یارک ،منگل23/مارچ2021
No comments:
Post a Comment